الحيطان
الحيطان منخل والدروب حفور
الحيطان منخل والدروب حفور
والبيبان صرخه بلا صدى ولاصوت
صفنة كنبرة بوحشة مسيت كبور
ووجوه الصغار الحاضنه الشباج باكة
ورد ذابل بالحزن معصور
والنظره متاهه وخوف يرضع خوف
من يهتز قفل حسبالهم شاجور
من يهتز قفل حتى الطيور أطيرمرعوبة
جنح وبلا وعيها أدور
ما ضل لا ملاذ يلوذ بيه الخوف
بس حسرة مراره بحشرجة مصدور
قامت والجراد اسراب تتلي اسراب
من تسكن الريح يعشعش المنذور
قامت والدقايق ترضع من الموت
كل لحظه بطبك كل ثانيه بعاشور
قامت والمنايا الي تختل ويه الناس
وتخاوي الرصاصه الصكر والعصفور
قامت والبشر مو بشر غابة زور
يحصدها العصف ويلوجها التنور
حتى الماي ورثوالتوى الصفصاف شاحب
والنهر من كثر غيضه يفور
والموت بصلافه يدك على البيبيان
ويوزع عليها السدر والكافور
هنا دفتر كتابه
هنا حمامة بيت
هنا وصلة جديله بجف طفل مبتور
هنا تربة صلاة والدم عليها هلال
هنا مصحف جلاله من العصف منشور
هنا صرخة نثايه تشتت بالريح
على جثه تململ من جلب مسعور
قامت والمنايا أدور فوك الروس
صفنت رحى الكاع ورحى الموت أدور
قامت من دخيلك يا علي الكرار
مو هاي القيامه المن بعد ما تكوم
مو هاي القايمه المن بعد ما تكوم
