مرينه بيكم حمد وأحنه بقطار الليل
وأسمعنه دك اكهوه وشمينه ريحة هيل
ياريل صيح أبقهر صيحة عشك ياريل
هودر هواهم ولك حدر السنابل كطه
يابو محابس شذر يالشاد خزامات
ياريل بله بغنج من تجزي بمشامات
ولا تمشي مشية هجر:كلبي بعد مامات
هودر هواهم ولك حدر السنابل كطه
جيزي المحطة بحزن وونين يا فراكين
ما ونسونه بعشكهم عيب تتونسين
ياريل جيم قهر،أهل الهوى أمجيمين
هودر هواهم ولك حدر السنابل كطه
ياريل طلعوا دغش والعشك جذابي
دك بيه طول العمر ما يطفه عطابي
نتوالف ويه الدرب وترابك ترابي
هودر هواهم ولك حدر السنابل كطه
أرد أشري جنجل وألبس الليل خزامه
وارسم بدمع الضحج نجمه وهوى وشامه
وياحلوه بين النجم طباكه لحزامه
هودر هواهم ولك حدر السنابل كطه
جن حمد فضة عرس جن حمد نركيله
مدكك بمي الشذر ومشله أشليله
ياريل ثكل يبويه وخلي أناغيله
يمكن أناغي بحزن..منغه..ويجن الكطه
آنه أرد ألوك لحمد ما لوكن لغيره
يجفلني برد الصبح وتلجلج الليره
ياريل باول زغرنه لعبنه طفيره
هودر هواهم ولك حدر السنابل كطه
كضبة دفو يانهد لملمك برد الصبح
ويرجفنك فراكين الهوى ياسرح
ياربل لا...لا...تفززهن..تهيج الجرح
خلهن يهودرن حدر الحراير..كطه
جن كذلتك والشمس والهوى هلهوله
شايل بريسم والبريسم أله سوله
وذري ذهب يا مشط يالخلكك شطوله
بطول الشعر والهوى البارد ينيم الكطه
تو العيون أمتلن ضحجات وسواليف
ونهودي زمن والطيور الزغيره تزيف
ياريل سيس هوانه وماأله مجاديف
هودر هواهم ولك حدر السنابل كطه
